Gnéithe struchtúracha

· Tá gá le fíornasc ballraíochta leis na ballpháirtithe nó leis na balleagraíochtaí. Tá fíornasc ballraíochta ann, inter alia, má tá raon iomlán de chearta agus oibleagáidí ag ballpháirtithe nó ag balleagraíochtaí, e.g. cearta agus oibleagáidí maidir le vótáil/rannpháirtíocht/rochtain ar dhoiciméid.

· Ina theannta sin, má tá fíornasc ballraíochta ann ní mór táille bhallraíochta iomchuí a íoc. Go dtí go n-íoctar táille bhallraíochta den sórt sin, tá fianaise ag teastáil gur ghlac an ballpháirtí nó an balleagraíocht páirt go fírinneach agus go follasach i ngníomhaíochtaí an iarratasóra ar chlárú.

· Chun fíorchomhaltas maidir le páirtithe polaitiúla Eorpacha a fhionnadh, féadfaidh an tÚdarás a fhíorú freisin an bhfuil neamhréireacht fhollasach idir clár polaitiúil an iarratasóra ar chlárú mar pháirtí polaitiúil Eorpach agus clár polaitiúil aon cheann dá bhallpháirtithe.

• De réir Airteagal 3(3) de Rialachán (AE, Euratom) Uimh. 1141/2014, ní mór a áirithiú gurb ann do scaradh idir an bhainistíocht laethúil, na struchtúir rialaithe agus na cuntais airgeadais faoi seach de gach páirtí polaitiúil Eorpach agus an fhondúireacht pholaitiúil Eorpach chleamhnaithe.
  • Maidir leis na struchtúir rialachais faoi seach, ciallaíonn sé seo go háirithe go gcaithfidh comhlachtaí rialaithe an dá eagraíocht fanacht ní hamháin éagsúil lena chéile go foirmeálta, ach freisin de bheith in ann, ó thaobh struchtúir de, cinntí rialachais a ghlacadh neamhspléach ar a chéile go hiarbhír.
    
    
    • I measc na sonraí atá le meas i ndáil leis seo, tá na nósanna imeachta cinnteoireachta atá i reachtanna nó forálacha cur chun feidhme an dá eagraíocht, go háirithe maidir le tomhas a dhéanamh ar chearta vótála an tsealbhóra oifige i gcomhlachtaí rialaithe an dá eagraíocht agus aon chumhachtaí feidhmiúcháin a dhílsítear go díreach don sealbhóir oifige sin.
    
    
    • Dá réir sin, ba cheart é a eisiamh gur féidir leis an duine i gceist, ar a rún féin agus gan gá tromlach a lorg i mbord rialaithe na heagraíochta sin, cinneadh a fhorchur ar cheann den dá eagraíocht , arna ghlacadh ag an eagraíocht eile faoi seach nó thar a ceann. D'fhéadfadh sé go mbeadh tábhacht bhreise leis nacumhachtaí a dhílsítear don oifig atá beartaithe don duine sin.
    
    
    • Maidir leis an mbainistíocht laethúil, níl cead céannacht iomlán foirne a bheith ann. I gcás forluí páirteach, mionscrúdóidh an tÚdarás má tá leibhéal leordhóthanach de neamhspleáchas oibríochtúil ag an dá eintiteas ann i gcónaí.

• I gcomhréir le Airteagal 10(4) den Chonradh ar an Aontas Eorpach maille le hAirteagail 2(1), 2(4), 3(1)(b) agus 3(2)(e) de Rialachán (AE, Euratom) Uimh. 1141/2014, caithfidh difríochtaí áirithe a tharraingt idir saoránaigh nó eintitis an Aontais agus saoránaigh nó eintitis nach den Aontas iad ina gcuid caidreamh le páirtithe polaitiúla Eorpacha nó fondúireachtaí polaitiúla Eorpacha. Seachas na hiarmhairtí do ranníocaíochtaí agus deonacháin, ní mór a bheith san airdeall maidir leis an méid rannpháirtíochta atá ag saoránaigh nó eintitis nach den Aontas iad i struchtúir rialachais na bpáirtithe agus na bhfondúireachtaí polaitiúla Eorpacha.


• Go háirithe, ní mór a áirithiú nach féidir leo siúd nach bhfuil saoránacht an Aontais acu nó ar eintitis nach den Aontas iad a bheith in ann, ina n-aonar nó le chéile,
  
  
  • gníomhaíocht a fhorchur i gcoinne, nó
  
  
  • bac a chur ar, tromlach de shaoránaigh an Aontais a chaitheann vótaí nó de bhaill comhlachtaí rialaithe de Pháirtí polaitiúil Eorpach nó fondúireacht pholaitiúil Eorpach.

Gan dochar do na glaonna ar ranníocaíochtaí ó Pharlaimint na hEorpa agus don chinneadh críochnaitheach ó Oifigeach Údarúcháin Pharlaimint na hEorpa maidir leis na hiarratais, fíoraíonn an tÚdarás um Páirtithe Polaitiúla Eorpacha agus um Fhondúireachtaí Polaitiúla Eorpacha na haighneachtaí ó pháirtithe polaitiúla Eorpacha a bhaineann lena bhFeisirí cleamhnaithe i gcomhthéacs chleachtadh bliantúil chistiú an Aontais.

I ndáil leis sin, fíoraíonn an tÚdarás:

• Maidir le héilimh ar bhallraíocht mar gheall ar bhallpháirtí:
  • an fíorchomhalta den pháirtí polaitiúil Eorpach é an páirtí polaitiúil ar ar a liosta a toghadh an Feisire atá luaite ar an dáta deiridh chun iarratais ar chistiúchán a chur isteach i.e. ar íocadh an táille ballraíochta is déanaí nó, ina éagmais sin, an ann d'fhianaise eile ar fhíor-rannpháirtíocht le déanaí i ngníomhaíochtaí an pháirtí pholaitiúil Eorpaigh;
  • an raibh an Feisire lena mbaineann ina chomhalta den bhallpháirtí atá i gceist ar an dáta deiridh chun iarratais ar chistiúchán a chur isteach.
• Maidir le héilimh ar bhallraíocht aonair: an bhfuil an Feisire lena mbaineann tagtha chun bheith ina chomhalta aonair nó atá fós ina chomhalta aonair den pháirtí polaitiúil Eorpach amhail ar an dáta deiridh chun iarratais ar chistiúchán a chur isteach. Beidh tábhacht ar leith ag baint leis na seiceálacha sin d'Fheisirí nua nó d'Fheisirí nár éilíodh mar chomhaltaí aonair roimhe sin.

Chuir an tÚdarás foirmeacha ar fáil do pháirtithe polaitiúla Eorpacha lena n-éascaítear fíorú na bpointí thuas. Má tá foirmeacha ar iarraidh, má tá siad neamhiomlán nó má thagann ceisteanna eile soiléireachta nó cruinnis chun cinn in ábhar iarratais an pháirtí pholaitiúil Eorpaigh, déanfaidh an tÚdarás fíoruithe breise, lena n-áirítear, i gcás inarb ábhartha, trí cheisteanna i gcomhair doiciméadacht bhreise i gcomhréir le hAirteagal 24(4) de Rialachán (AE, Euratom) Uimh. 1141/2014.

Déantar measúnú ar thrasbhallraíocht fhéideartha an Fheisire de chuid Pharlaimint na hEorpa i bpáirtí polaitiúil Eorpach bunaithe ar Airteagal 17(3) de Rialachán (AE, Euratom) Uimh. 1141/2014 (an 'Rialachán').

• I bhfianaise an mhéid sin, ní féidir Feisire de Pharlaimint na hEorpa ar comhalta é nó í i bpáirtí polaitiúil ar leibhéal na mBallstát a áireamh le haghaidh páirtí polaitiúil Eorpach seachas páirtí polaitiúil náisiúnta ar fhíorchomhalta é nó í de pháirtí polaitiúil náisiúnta.
• Mar sin féin, níl Feisire de Pharlaimint na hEorpa atá ina chomhalta in eagraíochtaí polaitiúla tríú tír atá ina 'chomhalta cleamhnaithe' i bpáirtí polaitiúil Eorpach eile sa phost céanna, toisc nach féidir eagraíocht pholaitiúil tríú tír a mheas mar fhíor-bhallpháirtí i bhfianaise an chásdlí maidir le hAirteagal 2 den Rialachán (féach go háirithe Breithiúnas na Cúirte Ginearálta an 25 Samhain 2020, ACRE v PE, T-107/19).
• A mhéid a bhaineann le fíoruithe an Údaráis, agus gan dochar do mheasúnuithe ó Oifigeach Údarúcháin Pharlaimint na hEorpa, is féidir, dá bhrí sin, Feisire de Pharlaimint na hEorpa a áireamh mar chomhalta aonair i gcás páirtí polaitiúil Eorpach seachas an páirtí polaitiúil Eorpach inar 'comhalta cleamhnaithe' í eagraíocht pholaitiúil tríú tír an Fheisire sin, má chruthaítear an bhallraíocht aonair.

Tá an méid uile thuas gan dochar d'fhíoruithe ar imthosca nithiúla, go háirithe i gcomhthéacs an iarratais ar chistiúchán chuig Parlaimint na hEorpa, agus do threoir an Údaráis maidir le coimircí i gcoinne trasnaíocht eachtrach.